Ei lang liste med fagforeiningsaktivistar lid i iranske fengsel utan føregåande rettssak og dom. Blant dei er fleire lærarar.

Education International (EI) prøver å setje press på iranske styresmakter og har saman med Labour Start og Global Unions starta ei underskriftskampanje. Du kan støtte aksjonen ved å gå inn på denne lenka:

Løslat fengslede fagforeningsaktivister nå!

I årevis har iranske lærarar, og andre fagforeiningsaktivistar, kravd ordentlege arbeidsvilkår og anerkjenning av grunnleggjande rettar og fridom som arbeidstakarar og borgarar. Prisen for slik aktivitet har ofte vore arrestasjonar og fengslingar, mange i årevis. Sidan mai 2022 har fleire lærarar og fagforeiningsleiarar urettmessig blitt arresterte, varetektsfengsla og torturerte etter å ha deltatt i fredelege og lovlege lærarorganisasjonsaktivitetar.

Nyleg gjennomførte Education International, i samarbeid med Coordinating Council of Iranian Teacher Trade Associations, ein studie som også viser at styresmaktene har forsøkt å skremme foreldre og born bort frå skulane. Minst 358 giftåtak er utførte mot jenteskular i 29 iranske delstatar. Etterverknadane har mellom anna vore pustevanskar, kvalme og oppkast, alvorleg hovudverk og mageplager. Skulejenter og kvinnelege studentar er utsette for valdsbruk og press frå styresmaktene. Dei opplever diskriminering og undertrykking i utdanningssystemet. Dette skjer mellom anna gjennom kjønnsskilje, partiske lærebøker, tidleg giftemål, tvangsekteskap og krav til kleskodar.

Dei iranske styresmaktene har vist si likegyldigheit ved ikkje å svare på desse alvorlege hendingane.

Dette skjer eitt år etter at den unge jenta Jina Mahsa Amini døydde i varetekt fordi ho bar hovudplagget hijab feil, ifølgje iranske styresmakter. Det førte til opprør i gatene, som iranske styresmakter har prøvd å slå tilbake med vald, seksuelle overgrep og tortur. No prøver dei å gjere det same igjen.

Også Noreg har markert eittårsdagen for drapet på Jina Mahsa Amini. Det er viktig å halde iranske styresmakter ansvarlege og ikkje gløyme det som har skjedd og skjer dagleg i Iran!