I åra framover kommer Noreg til å mangle folk til å gjere jobbane, samtidig som vi må forberede oss på å klare oss med mindre oljeinntekter. Læraryrka er ikkje noko unntak, og det gjer Røsvoll bekymra for framtida.

– Me merkar oss bekymringa for auka behov for ansatte i helse- og omsorgssektoren, og forstår ho, men:

– I ei uroleg verd er læraryrket viktigare enn nokon gong. At vi manglar folk i desse viktige jobbane er urovekkjande. Me må kunne gjere ei satsing på helse- og omsorgssektoren samstundes som me styrker utdanningssektoren, seier Geir Røsvoll om Perspektivmeldinga.

Meldinga blir lagt fram kvart fjerde år, og handlar om dei økonomiske utsiktene for Noreg i eit langsiktig perspektiv. Finansminister Trygve Slagsvold Vedum (Sp) la fram meldinga på ein pressekonferanse i dag.

Han trakk fram tre hovudutfordringar for framtida: Kamp om arbeidskrafta, behov for omstilling og fortsatt god fordeling av ressursane.

Les meldinga her: Meld. St. 31 (2023-2024) Perspektivmeldingen 2024 (regjeringen.no)

Kritisk i nord

I Perspektivmeldinga blir det peika på utfordringar med å skaffe arbeidskraft til distriktskommunar. Skular og barnehagar merker allereie dette godt.

– I nord er situasjonen ekstra kritisk, me ser barnehagar som må stenge og stor mangel på lærarar i skulen, det utfordrar tanken om at alle skal ha eit likeverdig utdanningstilbod uansett kvar i Noreg vi bur, seier lærarleiaren.

Likevel meiner han regjeringa og partane i fellesskap kan gjere tiltak for å motverke desse trendane.

– Saman med regjeringa har alle partar i sektoren laga ein rekrutteringsstrategi, den er viktigare enn nokon gong. Med dei rette rammene er læraryrket fantastisk. Våre barn og unge fortener ein barnehage og skule der både dei og lærarane trivast og lærer, seier Røsvoll.

Les meir: Ny rekrutteringsstrategi: – Anerkjenner lærerkrisen

Middel mot utanforskap

Meldinga peiker på at det er blitt fleire som står utanfor arbeidslivet, og andelen yngre som står utanfor har auka kraftig dei siste 20 åra. Om lag 14 prosent av befolkninga mellom 16-66 år mottar anten arbeidsavklaringspenger eller uføretrygd (tal frå desember 2023).

– Eit viktig middel mot utanforskap er ein skule for alle. Politikarane har skapt ein skule med eit smalare innhald som færre lukkast i. Vi må endre retning om me skal løyse dei utfordringane perspektivmeldinga peikar på, meiner Geir Røsvoll.