Den ferske kunnskapsministeren peikar på at mobilen påverkar dei faglege resultata negativt og fører til utanforskap og mobbing. Derfor ønsker ho nasjonale retningslinjer.

– Målet er at me får bukt med dette og ser på restriksjonar knytt til mobilbruk i skulekvardagen, seier ho til NRK.

– Må kunne tilpassa undervisninga

Leiar i Utdanningsforbundet Steffen Handal er positiv til at Kunnskapsdepartementet ber Utdanningsdirektoratet utgreia og koma med sine tilrådingar om mobilbruk i skulen. Men han understrekar at direktoratet må involvera profesjonen dersom dei skal lukkast med dette arbeidet.

– Det er heilt avgjerande at eit nytt regelverk ikkje avgrensar lærarane sin moglegheit til å tilpassa undervisninga til elevane sitt beste, seier Handal.

I Noreg er det opp til kvar einskild kommune å regulera mobilbruken. Handal meiner mange lærarar er bekymra for den omfattande skjermbruken til elevane, både på skulen og i fritida.

Handal peikar på at mange skular i dag har reglar som avgrensa skjerm- og mobilbruk. Nasjonale tilrådingar må først og fremst bidra til å styrkja kunnskapsgrunnlaget skulane treng når dei skal handtera dette i kvardagen, ifølgje Handal.

– Me vil bidra til at denne prosessen vert prega av erfaringane våre medlemmer har. Kva tilrådingar som bør koma ut av dette gjenstår å sjå, seier han.