Eit av valløfta statsminister Jonas Gahr Støre (Ap) kom med i valkampen var å fjerna kompetansekravet til lærarar.

Forslaget skal etter planen sendast ut på høyring i løpet av våren.

Eit fleirtal på Stortinget, inkludert Arbeidarpartiet, gjekk inn for kravet i 2014. Då Støre snakka med NTB i fjor og varsla at partiet gjekk til val på å skrota kravet, forklarte han det med konsekvensane kravet har hatt.

Kravet seier at alle som underviser i matematikk, engelsk eller norsk i barneskulen ha minimum 30 studiepoeng frå 2025. I ungdomsskulen må dei ha minst 60 studiepoeng i dei same faga. Krava fekk tilbakeverkande kraft, og gjaldt dermed òg for lærarar utdanna før 2014.

Dåverande forskings- og høgare utdanningsminister Henrik Asheim (H) kalla Støres snuoperasjon «ei heilt utruleg prioritering».

— Kompetansekrav er eit tiltak som skal sikra alle elevar retten til å bli undervist i norsk, matta og engelsk av ein lærar som faktisk har studiepoeng i faget, sa Asheim til NTB.

I 2022 har regjeringa sett av 1,7 milliardar kroner til vidareutdanning for lærarar og 100 millionar kroner til vidareutdanning for barnehagelærarar.

— Det viktigaste for at barn og unge skal læra, meistra og trivast er at dei møter dyktige og fagleg trygge tilsette i barnehagar og skular. Då må vi ha eit vidareutdanningstilbod som er breiare og gir plass til fleire fag.

Som ein start utvidar me tilbodet i dei praktiske og estetiske faga, skriv kunnskapsminister Tonje Brenna (Ap) i ei pressemelding.

600 lærarar skal få tilbod om vidareutdanning i praktiske og estetiske fag som kunst og handverk, musikk og kroppsøving, ei dobling frå i fjor.

Brenna skriv vidare at det er ønskjeleg med ein meir praktisk og variert skule.

— Det vil bidra til at elevar lærer og trivst meir, og vi treng skular med brei fagkompetanse. Tilbakemeldingar frå skular og undersøkingar viser òg at det er behov for å styrkja kompetansen i desse faga. Vi ønskjer å stimulera til meir praktisk læring i alle fag slik dei nye læreplanane legg opp til, skriv Brenna.