Vern om skuletilbodet i Midt-Gudbrandsdalen

Innlandet fylke står no overfor ei stor omstrukturering av skuletilbodet for vidaregåande skular. Som ein del av denne prosessen, vert det foreslått å legge ned fleire skular og endre fagtilbodet på andre. Det er ikkje fremma forslag om endringar eller kutt ved Vinstra vidaregåande skule i høyringsdokumenta. Denne innstillinga må ikkje rokkast ved, og det er fleire grunner til at skuletilbodet ved Vinstra bør stå urørt.  

Fylkeskommunen sitt hovudfokus er å utvikle robuste fagmiljø og skape stabilitet for både elevar og tilsette. Vinstra vidaregåande skule har gjennom åra hatt stabile søkartal. For skuleåret 24/25 er alle yrkesfaglege liner fulle. Den forventa elevnedgangen fram mot 2038 er av dei minste i fylket. Dette er eit stabilt fundament som bør vernast.  

Vinstra vidaregåande skule er tufta på Gudbrandsdal landsgymnas, og har lange og gode akademiske tradisjonar som er vidareført sidan starten i 1946. Ved å oppretthalde eit sterkt studiespesialiserande tilbod bidreg skulen til å sikre at regionen kan møte framtidige utfordringar med godt kvalifiserte kandidatar. Realfag og språk er ikkje berre viktig for dei elevane som har som mål å studere vidare på universitet og høgskular, men dei er også essensielle for bedrifter i regionen. Undersøkingar viser at tilsette med høgare utdanning er mangelvare for næringslivet i Midt-Gudbrandsdalen. 

Musikklina og landslina for folkemusikk gjev óg elevane studiekompetanse. I fleire av fellesfaga er studiespesialiserande og musikkelevane i same undervisningsgrupper. Dette er liner som bidreg til mykje meir enn berre teoretisk kunnskap. Ein del elevar går vidare som profesjonelle utøvarar på høgt nivå, medan andre bruker musikken som hjelp til å kome gjennom teoritunge år. Både elevar og lærarar gjev uvurderlege bidrag til kulturlivet.  

NAV sin bedriftsundersøking for 2023 viser at det er stor mangel på kvalifisert arbeidskraft i Innlandet, spesielt innan helse- og sosialsektoren, bygg- og anlegg, samt tekniske fag som krev fagbrev. Ein av dei mest markante styrkane ved Vinstra vidaregåande skule er det solide fagmiljøet innan yrkesfag. Her er det ein lang tradisjon for å utdanne elevar og få dei ut i lærlingplassar i lokale bedrifter. Dette er eit viktig samarbeid som må byggast vidare på for å sikre rekruttering av arbeidskraft til næringslivet i regionen.  

Det handlar ikkje berre om tal og økonomi, men om menneske, samfunn og framtidsutsikter. Ein sterk vidaregåande skule i Midt-Gudbrandsdalen er avgjerande for å oppretthalde eit levande og berekraftig lokalsamfunn. Skulen er ikkje berre ein læringsarena, men ein sentral samfunnsaktør som bidreg til lokal identitet, kultur og tilknyting, samt at det er ein av dei største arbeidsstadane i Gudbrandsdalen! Difor bør Innlandet fylkeskommune anerkjenne verdien av Vinstra vidaregåande skule som ein uunnverleg del av regionen sin framtidige utdanningsstruktur, og sørgje for at den vert styrka i staden for å bli svekka. 

Det er grunn til å minne om dei to viktige prinsippa som tanken om landsgymnas ein gong i tida var tufta på: 

1. Alle ungdommar har rett til, uansett økonomisk-sosial klasse, utdanning i nærområdet. 
2. Bygdeungdom har like stor rett til utdanning i nærområdet som byungdom.  

Dette er prinsipp som står seg like godt i dag.

Inge Jostein Findalen, Lokallagsleiar, Utdanningsforbundet Nord-Fron

Innlegget er publisert i:

• GD - nettside 17.09.24: https://www.gd.no/vern-om-skuletilbodet-i-midtdalen/o/5-18-2103314
• GD - papiravis 19.09.24
• Dølen - papiravis 19.09.24

Lokallagsstyret har sendt inn høyringssvar til fylkeskommunen. Les meir om det her: https://www.utdanningsforbundet.no/fylkeslag/innlandet/lokallag/nord-fron/nyheter/2024/hoyringssvar-skule--og-tilbodsstruktur-i-innlandet/