Les Er læreplanen LK20/LK20S innført i norsk skule? Lærarar si vurdering. Rapport 3/2024

Samandrag

Sidan innføringa av Læreplanverket Kunnskapsløftet, forkorta LK20/LK20S, har det vore variasjon i kor langt skulane er kome i arbeidet med å gjere om LK20/LK20S til praksis. Utdanningsforbundet har sidan 2021 følgt med på korleis dette arbeidet har føregått gjennom årlege undersøkingar til Utdanningsforbundets arbeidsplasstillitsvalde i grunnskulen og vidaregåande skule. Ein slik undersøking er også gjennomført i 2024. I tillegg er det i år sendt ut ei undersøking til lærarar i grunnskulen og i vidaregåande skule som er medlemmer av Utdanningsforbundet. Dette gjer at me kan få innsikt i korleis det pågåande arbeidet opplevast av lærarane direkte.

Svara frå lærarane tyder på at nokre skular har hatt vanskar med å få tak i fornya læremiddel, imens andre har hatt oppdaterte læremiddel frå eit tidleg tidspunkt. Over tid har me sett at fleire og fleire skular har fått moglegheit til å oppdatere læremidla. Halvparten av lærarane i undersøkinga melder om at ein har oppdaterte læremiddel for sine fag, samstundes som det er heile 28 prosent av lærarane som svarar at ein ikkje har oppdaterte læremiddel. Læremidla er fornya i minst grad i grunnskulen samanlikna med i vidaregåande skule.

Digitale eller papirbaserte læremiddel?

Undersøkinga kartlegg fornying av læremiddel og fordelinga mellom digitale eller papirbaserte læremiddel. I grunnskulen er det digitale læremiddel som i hovudsak vert prioriterte ved innkjøp. Dette samanfell med tidlegare funn frå undersøkingane til Utdanningsforbundet. I vidaregåande skule er prioriteringa motsett, der det i hovudsak er kjøpt inn papirbaserte læremiddel.

Får lærarane læremidla dei ønsker seg?

Resultata frå denne undersøkinga viser at skulen sine innkjøp av læremiddel ikkje samsvarer med kva lærarane ønsker seg av digitale og/eller papirbaserte læremiddel. Flest (53 prosent) svarar at dei ønsker seg ei 50/50-fordeling, men begge deler er ikkje tilgjengelege for alle lærarar i alle fag. Nærmare halvparten svarar at ein står fritt til å velje type læremiddel. Lærarar frå vidaregåande står friare til å velje læremiddel enn lærarane i grunnskulen. På den andre sida er det 34 prosent av lærarane totalt som svarar at dei i liten eller i svært liten grad står fritt til å velje læremiddel.

Kor tilgjengelege er læremidla for elevar som treng det?

Undersøkinga ser også på kor tilgjengelege læremiddel er for elevane ved skulen. Over halvparten av lærarane svarar at dei ikkje har tilgjengelege læremiddel for elevar som har samisk som første- eller andrespråk. Det er også ein stor del som ikkje veit om dette er tilgjengeleg for sine elevar. Vidare er det 23 prosent av lærarane som har elevar med nynorsk som hovudmål, som seier at dette i liten eller i svært liten grad er tilgjengeleg. Til slutt vert lærarane spurde om tilgjengelegheita på læremiddel som er spesielt tilrettelagde for elevar. 38 prosent svarer at dette er tilgjengeleg i ganske eller i svært liten grad, imens 35 prosent av lærarane svarer at dette var tilgjengeleg for elevane som trengte dette.

Bakgrunn for undersøkinga

Nytt læreplanverk (LK20/LK20S) vart teke i bruk frå hausten 2020. Sidan den gong har Utdanningsforbundet følgt utviklinga gjennom mellom anna årlege spørjeundersøkingar:

• Er læreplanen LK20/LK20S innført i norsk skule? Tillitsvalde si vurdering. Rapport 2/2024
• Læremiddelsituasjonen i norsk skule: arbeidsplasstillitsvalde si vurdering. Rapport 2/2023
• Fagfornyelsen: status, ressurser og partssamarbeid på skolene 2022 – resultater fra en undersøkelse blant arbeidsplasstillitsvalgte. Rapport 2/2022
• Fagfornyelsen: status, ressurser og partssamarbeid på skolene – resultater fra en undersøkelse blant arbeidsplasstillitsvalgte. Rapport 2/2021

I denne femte undersøkinga gjennomført vinteren 2024 har me stilt spørsmål til lærarane om arbeidet med LK20/LK20S. Undersøkinga tek føre seg korleis LK20/LK20S er gjort om til praksis på skulane og i lærarane si undervisning. Lærarane har også svart på spørsmål om læremiddelsituasjonen og tilgjengelegheita på oppdaterte læremiddel etter LK20/LK20S, om dei har ei felles forståing av LK20/LK20S sine sentrale omgrep, og om kollegiet har fått arbeidd med LK20/LK20S i utviklingsarbeid. Lærarane vart også spurde om kva dei tykkjer at må prioriterast for å lukkast med LK20/LK20S.

Om undersøkinga

Undersøkinga vart gjennomført i januar og februar i 2024. Den blei sendt ut som ei nettundersøking til 6999 av Utdanningsforbundet sine medlemer i grunnskule og vidaregåande skule.

Les rapporten Er læreplanen LK20/LK20S innført i norsk skule? Lærarar si vurdering. Rapport 3/2024