Utdanningsforbundet meiner høyringsnotatet har eit klart og tydeleg elevperspektiv. Det er bra og har vår fulle støtte. Vi meiner samstundes at lærar- og tilsett-perspektivet er mangelfullt i høyringsnotatet. Sjølv om opplæringslova er ei lov som regulerer elevane sine rettar, meiner vi at høyringsnotatet burde ha reflektert over spenninga mellom omsynet til elevar og tilsette i skulen, mellom opplæringslova og til dømes arbeidsmiljølova. Det treng ikkje vere ei motsetning mellom elevar og tilsette sine rettar og plikter, men det finst reelle spenningar som departementet underkommuniserer. Eit døme er tilsette sin rett til uttale og kontradiksjon.

Utdanningsforbundet meiner som departementet at uro i undervisninga i utgangspunktet må handterast med ei fagleg-pedagogisk tilnærming, at god klasseleiing kan motverke slik uro, og at skulen må vurdere årsakene til uroa og korleis ein eventuelt kan organisere opplæringa annleis og tilpasse opplæringa best mogleg. Vi er også heilt på linje med departementet om at «tilstrekkelig antall ansatte med rett kompetanse [er] viktig for å skape gode klassemiljø». Men – når vi kjenner den generelle ressurssituasjonen i skulen og når vi veit at nesten 20 prosent av årsverka til undervisning i Noreg vert uført av personar utan lærarutdanning, hadde vi forventa at departementet omtalte og vurderte den reelle kompetansesituasjonen i skulen i diskusjonen om klasseleiing og relasjonskompetanse som grunnlag for å skape eit godt klassemiljø som er i samsvar med lovkrava.

Les mer: vårt høringssvar (PDF, 144kB)