Utdanningsforbundet vil innleiingsvis takke Utdanningsdirektoratet og Kunnskapsdepartementet for å ha lagt til rette for ein open, brei og omfattande prosess for utvikling av nye læreplanar.

Vi finn det positivt at tidsramma har vore vesentleg utvida samanlikna med tidlegare læreplanfornyingar og -reformer, sjølv om det også denne gong har vore periodevis høgt tempo.

Ved oppnemning av ymse læreplangrupper har profesjonen og ulike fagmiljø vore involvert i planarbeidet. Gjennom fleire innspelrundar har heile Skule-Noreg hatt høve til å vurdere og kommentere ulike skisser og utkast. Ein slik prosess legg til rette for at profesjonen får god forståing for grunngjeving og innhald i fagfornyinga, og at lærarar og leiarar kan identifisere seg med og få eit eigarforhold til dei endelege læreplanane. Prosessen har også lagt til rette for gode diskusjonar og refleksjonar i lærarfellesskapa på skulenivå.

Samstundes vil Utdanningsforbundet peike på at den siste fasen fram mot høyringa ikkje var ideell. Utdanningsforbundet hadde som sentral part i fagfornyinga og som representant for eit stort fleirtal av lærarar og skuleleiarar, forventa sterkare grad av «medvirkning, medbestemmelse, forankring og medskaping» i perioden frå innspelrunda i oktober-november 2018 og fram mot høyringa i mars 2019. Her var vi i liten grad kopla på.